சட்டீஷ்கர் தந்தேவாடாவில் தொடரும் துயரங்கள்!!

மார்ச் 24, தர்மேட்லா: சட்டீஷ்கரில் தந்தேவாடாவில் மூன்று கிராமங்களை பாதுகாப்பு படையினர் தீவைத்துக் கொளுத்தியுள்ளனர். மாவோயிஸ்டுகளை எதிர்கொள்ள அனைத்துவித தயாரிப்புகளுடன் வந்த 350க்கும் அதிகமான பாதுகாப்பு படையினர் கொடூரமான தாக்குதலை கட்டவிழ்த்துவிட்டனர்.

300 வீடுகளை அவர்கள் சேதமாக்கினர். மூன்று பெண்கள் பாலியல் வன்புணர்வுக்கு ஆளாக்கப்பட்டனர். மேலும் கிராமவாசிகளின் தானியக் கிடங்குகளை அழித்துள்ளனர். இச்சம்பவத்தைக் குறித்து விசாரணை நடத்த மாவட்ட கலெக்டர் ஆர்.பிரசன்னா உத்தரவிட்டுள்ளார். விசாரணைக்கு ஐந்து உறுப்பினர்களைக் கொண்ட குழு நியமிக்கப்பட்டுள்ளதாக பிரசன்னா தெரிவிக்கிறார்.

தாக்குதல் நடந்த கிராமங்களை பார்வையிட முயன்ற பத்திரிகையாளர்களை ஆதிவாசிகளை உட்படுத்தி அரசு உருவாக்கிய ஸ்பெஷல் போலீஸ் அதிகாரிகளின் ஆயுதக்குழு தடுத்து நிறுத்தியது. காடுகளினூடே சஞ்சரித்த ‘தி ஹிந்து’ பத்திரிகையின் செய்தியாளர்தாம் பாதுகாப்பு படையினரின் அராஜகத்தை வெளிக்கொணர்ந்தார்.

கிராமங்களில் மாவோயிஸ்டுகளை வேட்டையாட இந்த மாதம் துவக்கத்தில் பாதுகாப்பு படை திட்டம் உருவானது. மோர்பள்ளி கிராமத்தில் மாவோயிஸ்டுகள் ஆயுத தொழிற்சாலை நடத்துவதாக போலீஸிடம் சரணடைந்த மாவோயிஸ்டு ஒருவர் தெரிவித்திருந்தார்.

இதனைத் தொடர்ந்து ராணுவ நடவடிக்கைக்கு திட்டம் தயாரானது. இந்த தொழிற்சாலையை அழிக்க பாதுகாப்புபடை சிந்தல் நகரிலிருந்து காட்டை நோக்கி புறப்பட்டது. அருகிலுள்ள பகுதியில் நூற்றுக்கும் மேற்பட்ட மாவோயிஸ்டுகளிருப்பதாக ரகசிய புலனாய்வு தகவல் கிடைத்திருந்தன.

மோர்பள்ளி கிராமத்தை சுற்றி வளைத்த பாதுகாப்புப்படை வானத்தை நோக்கி துப்பாக்கியால் சுட்டது. இதனைக் கேட்டவுடன் நாங்கள் ஓடிவிட்டோம் என மோர்பள்ளியின் முன்னாள் ஸர்பஞ்ச் (பஞ்சாயத்து நிர்வாகி) நுபோமுத்தா தெரிவிக்கிறார்.

மரத்தின் அருகே புளியை சேகரித்துக் கொண்டிருந்த தனது கணவர் மாதவி சுல்லாவை பாதுகாப்பு படையினர் கொன்று மரத்தில் தொங்கவிட்டதாக அவரது மனைவி மாதவி ஹங்கே கூறுகிறார்.

பீடியிலையை சேகரித்துக் கொண்டிருந்த தன்னை தனது இரண்டு மகள்கள் பார்த்துக் கொண்டிருக்கவே பாலியல் பலாத்காரம் செய்ததாக 45 வயதான ஐம்லா கங்கி தெரிவிக்கிறார். தனது கைவசமிருந்த பத்தாயிரம் ரூபாயை பாதுகாப்பு படையினர் திருடியதாகவும் கங்கி கூறுகிறார்.

மாதவி கங்கி, மகன் பீமா, மகள் ஹுரே ஆகியோரை பாதுகாப்பு படையினர் பிடித்துச் சென்றுள்ளனர்.அதேவேளையில் முதல்நாள் ஆயுத தொழிற்சாலையையோ , மாவோயிஸ்டு களையோ மோர் பள்ளியில் தங்களால் கண்டறிய இயலவில்லை என போலீஸ் வட்டாரங்கள் தெரிவிக்கின்றன.

பின்னர் பாதுகாப்புப் படையினர் திம்மாபுரத்தில் முகாமிட்டனர். மார்ச் 14-ஆம் தேதி மாவோயிஸ்ட்கள் பதிலடிக் கொடுத்தனர். இதில் ஸ்பெஷல் போலீஸ் அதிகாரிகள் 3 பேர் கொல்லப்பட்டனர். 9 பேருக்கு காயமேற்பட்டது. மறுநாள் 50 கட்டிடங்களை பாதுகாப்பு படை தீக்கிரையாக்கியதாக கிராமவாசிகள் தெரிவிக்கின்றனர்.