அரசு பயங்கரவாதம் சாடுகிறார் அருந்ததிராய்!

மே 06/2013: ‘மக்களுக்கு எதிரான போர்’ என்ற தலைப்பில் டெல்லி  ராஜேந்திரபிரசாத் பவனில் நடத்தப்பட்ட கருத்தரங்கில் பல்வேறு தரப்பட்ட  சிந்தனையாளர்கள் கலந்து கொண்டு உரையாற்றினார்கள்.                              

அதில் பேசிய  பிரபல எழுத்தாளரும், சமூக ஆர்வலருமான அருந்ததிராய் காலனியாதிக்க ஆட்சியின் தொடர்ச்சியே இந்திய அரசு பயங்கரவாதம் என்று  கடுமையாக சாடினார்.

1947-ஆம் ஆண்டு இந்திய சுதந்திரமடைந்த வேளையில் காலனி அரசுதான் நாட்டில் அதிகாரத்திற்கு வந்தது. தெலுங்கானா, வங்காளம் உள்ளிட்ட  நாட்டின் எல்லைக்கு உள்ளாகவே ராணுவத்தை அனுப்பி அரசு சொந்த குடிமக்களுக்கு எதிராக போரை நடத்தியது. இவ்வகையான போர்கள் இன்றும் தொடர்கின்றன. 

இந்திய அரசு உயர்சாதி அரசாகும். இந்த அரசின் குணத்தை உலகின் வேறு எந்த அரசுடனும் ஒப்பிட முடியாது. சிறப்பு பொருளாதார மண்டலம் உள்ளிட்ட பல்வேறு வடிவங்களில் நிலபிரபுத்துவம் மீண்டும் அமல்படுத்தப்படுகிறது.  முந்தைய காலங்களில் நடத்திய சீர்திருத்தங்களின் பலனாக ஏற்பட்ட நலன்கள் கூட பலம் பிரயோகித்து மக்களிடமிருந்து பிடுங்கபடுகின்றன. உண்மையில் நாட்டை ஆள்வது மன்மோகன் சிங் அல்ல. டாட்டா, அம்பானி போன்ற தொழிலதிபர்கள்தான். ஆகையால்தான் முகேஷ் அம்பானிக்கு இஸட் பிரிவு பாதுகாப்பு அளிக்கப்பட்டுள்ளது.

இக்கூட்டத்தில் பேசிய பாப்புலர் ஃப்ரண்ட் ஆஃப் இந்தியாவின் தேசிய செயற்குழு உறுப்பினர் இ.எம்.அப்துல் ரஹ்மான் கூறியதாவது, சட்டத்தை அமல்படுத்தும் அரசே அதனை மீறுகிறது. சட்டங்களை இலகுவாக்குவதுடன், கறுப்புச் சட்டங்களையும் அரசே உருவாக்குகிறது. அப்ஸா, யு.ஏ.பி.ஏ, உள்ளிட்ட கறுப்புச் சட்டங்களால் பாதிக்கப்படுபவர்கள் பழங்குடியினரும், தலித்துகளும், தொழிலாளர்களும், முஸ்லிம்கள் உள்ளிட்ட சிறுபான்மை  மக்களே. இது போன்ற கருப்பு சட்டங்களை நீக்க மனித நேயம் கொண்ட ஒவ்வொருவரும் இணைந்து செயல்பட வேண்டியது காலத்தின் அவசியம் என்றார்.