மாணவர் புரட்சி ராஜபக்சேவுக்கு சாவு மணி அடிக்குமா?

Dec10: இலங்கை இறுதி போரோடு தமிழர் போராட்டம் முடிவுக்கு வந்து விட்டது என்று இலங்கை பயங்கரவாத அரசு கூறிவந்த வேளையில், யாழ் பல்கலைக் கழக மாணவர்களின் போராட்டம் தமிழீழ போராட்டம் முற்றுபெற வில்லை என்பதை உலகிற்கு அறிவித்துள்ளது.

மாவீரர் நாள் நிகழ்ச்சியை ஒருங்கிணைத்தார்கள் என்ற குற்றச்சாட்டின் பேரில் யாழ்ப்பாண பல்கலைக் கழகத்துக்குள் புகுந்த சிங்கள காவல்துறையினர் அங்கிருந்த தமிழ் மாணவர்களை கண்மூடித்தனமாகத் தாக்கியது. இதில் மாணவர்கள் பலர் படுகாயம் அடைந்தனர்.

அதுமட்டுமின்றி பத்துக்கும் மேற்பட்டவர்களைப் பிடித்துச் சென்றிருக்கிறது. அவர்கள் மீது பயங்கரவாதச் சட்டத்தின்கீழ் வழக்கு பதியப்பட்டிருப்பதாகத் தெரிகிறது. அவர்கள் இருக்கும் இடமும் வெளியில் அறிவிக்கப்படவில்லை. இதனால் வெகுண்டெழுந்த தமிழ் மக்கள் ஆயிரத்துக்கும் மேற்பட்டோர் அரசுக்கு எதிராக ஆர்ப்பாட்டத்தில் ஈடுபட்டிருக்கிறார்கள்.

முள்ளிவாய்க்கால் இனப்படுகொலைக்குப் பிறகு இவ்வளவு பெரிய ஆர்ப்பாட்டம் நடந்ததில்லை என்ற அளவுக்கு மக்கள் அதில் பங்கேற்றுள்ளனர். அதைத் தொடர்ந்து யாழ்ப்பாணம் நகருக்குள் தமிழர்களை வீடு புகுந்து வேட்டையாடும் நடவடிக்கையில் சிங்கள காவல்துறை இறங்கியுள்ளது. நேற்று முன்தினம் 25க்கும் மேற்பட்ட தமிழர்கள் சிங்கள காவல்துறையால் பிடித்துச் செல்லப்பட்டுள்ளனர்.

இராஜபக்சேவின் போர்க்குற்றங்கள் ஒவ்வொரு நாளும் அம்பலப்பட்டு வரும் நிலையில், சர்வதேச நாடுகளின் அழுத்தம் அதிகரித்து வருகிறது. சர்வதேச நாடுகள் ஆயுதம் இன்றி ஒரு உள்நாட்டு புரட்சியை ஏற்ப்படுத்தி சிரியா போன்று பன்னாட்டு படைகளை மக்களுக்கு ஆதரவாக அனுப்பி ராஜபக்சேவுக்கு முடிவு கேட்டலாம் என்று அரசியல் வல்லுனர்கள் கருதுகின்றனர்.